- 051 -
1448 (11. czerwca) [Wrocław], we wtorek przed dniem św. Wita Męczennika etc.
Rada miasta Wrocław do legnickiej w sprawie zastoju monetarnego.
— Unsern frundlichen grus zuvor. Erbern weizen liebin ……………….. von herczoge Wlodken wegin dancken wir euch f… und ……………….. dem ….nsem herren bisschofe von den sachen zuschreiben und zu beten umb den tag zulegen von herczoge Wlodken und ander wegin etc. Das haben wir getan und bestalt ee das uns ewir briff komen ist und wellen dobey unsern fleis gerne tuen. Ouch lieben frunde, als wir denne nehste off mitfasten mit uch und ouch den Sweidniczern die sachen von der heller muncze wegen mittenander vorhandilt und gewegen haben, das die faste zere obirhand nympt, das vor das armut und land und stete nichten ist, das man mit solchen munczen offhoren solde und abelossen, des wir mittenander off die czeit gancz eyne wurden, und ir uns ouch zutuende und offczuhoren zusaget, off den tag usgenomen eyn wening gekretcze und desgleichen weidet ir noch vormunczen und denne offhoren, solche beredunge wir an unsern gesworen kawfflute und gemeine brocht haben mit euch also abegeredt und vorlossen und haben doch sint der czeit vornomen, das das nicht gehaldin wirt und das ir noch bis doher ye und ye ane mittel gemunczt habt und noch munczen losset, domite wir ken den unsern obil volfarn, den wir das gesaget haben und bitten euch fruntlichen, ir wellet noch mit solchen munczen offheren, wenne es sicher genug und alczuvil ist, als sich das hernochmols finden mag, als wir uns beforen, wenne wie das nicht geschege, musten wir mit arm und reich den unsern zu rate werden, wie wir beswerunge und unrates mochten vorkomen und entladen werden. Des wellen wir euch gerne dancken, und begern des ewer vorschreben antwort.
Geben am dinstage vor Viti martiris anno etc. XLVIII°.
Ratmanne der stat Breslow.